وسل بلوئر کی شناخت سے متعلق صدر ٹرمپ کی ری ٹویٹ شدید تنقید کی زد میں

صدر ٹرمپ نے ایک ٹویٹ کو دوبارہ ٹویٹ کیا ہے جس میں انہوں نے انٹیلی جنس کمیونٹی سے تعلق رکھنے والے نامعلوم مبینہ وسل بلوئر کا نام ظاہر کیا ہے جس نے یوکرین کے صدر کے ساتھ صدر ٹرمپ کی خفیہ ٹیلی فون بات چیت کے بارے میں خبر دی تھی جس میں صدر ٹرمپ نے یوکرین کے صدر ولادی میر زیلنسکی پر زور دیا تھا کہ وہ صدر ٹرمپ کے سیاسی مخالف اور ڈیموکریٹک پارٹی کے ایک صدارتی امیدوار جو بائیڈن اور ان کے بیٹے کے حوالے سے تحقیقات کریں۔ صدر ٹرمپ نے جو ٹویٹ دوبارہ ٹویٹ کی وہ @Surfermom77 کے اکاؤنٹ سے کی گئی تھی۔ اکاؤنٹ ہولڈر نے خود کو ایک خاتون ظاہر کیا تھا اور بتایا تھا کہ ان کا نام صوفیہ ہے اور وہ کیلی فورنیا کی رہنے والی ہیں۔ تاہم کچھ ہی دیر بعد ہفتے کے روز یہ ٹویٹ غائب ہو گئی جس سے یہ تاثر ملا کہ صدر ٹرمپ نے خود یہ ٹویٹ ڈیلیٹ کر دی ہے۔ تاہم ہفتے کی رات کو یہ ٹویٹ ایک مرتبہ پھر دکھائی دینے لگی اور ٹویٹر نے نیوز ایجنسی اے پی کو بتایا کہ ان کے سسٹم کا کچھ حصہ ٹکنکی خرابی کا شکار ہو گیا تھا اور یوں بہت سے ٹویٹر صارفین یہ ٹویٹ نہ دیکھ پائے۔ صدر ٹرمپ نے بار بار مطالبہ کیا ہے کہ وسل بلوئر کا نام ظاہر کیا جائے۔ تاہم ان کی حالیہ ری ٹویٹ پہلا موقع ہے کہ انہوں نے خود وسل بلوئر کا مبینہ نام اپنے 6 کروڑ 80 لاکھ ٹویٹر فالوئرز کو بھجوایا۔ مبینہ وسل بلوئر انٹیلی جنس اداروں سے تعلق رکھتا ہے اور اس کی شناخت ظاہر کرنے سے تحفظ کے وفاقی قوانین کی خلاف ورزی ہو گی۔ امریکہ میں تاریخی طور پر دونوں بڑی سیاسی جماعتوں ڈیموکریٹک پارٹی اور رپبلکن پارٹی نے ہمیشہ ان قوانین کی حمایت کی ہے۔ سماجی رویے کی ویب سائٹ فیس بک اپنی پالیسی کے مطابق ایسی پوسٹ شائع کرنے سے انکار کرتا ہے جس میں مبینہ وسل بلوئر کی شناخت ظاہر کرنے کی کوشش کی گئی ہو۔ تاہم ٹویٹر کی ایسی کوئی پالیسی نہیں ہے اور اس نے یہ ٹویٹ جاری کرنے پر کوئی پابندی عائد نہیں کی۔ مختلف حلقوں کی جانب سے صدر ٹرمپ کے اس اقدام پر شدید تنقید کی گئی ہے۔ غیر جانبدار ایڈووکیسی تنظیم ’’دا نیو ایجنڈا‘‘ کی صدر ایمی سسکنڈ نے کہا ہے، ’’ہمارے ملک کے صدر کا یہ رویہ قطعی طور پر ناقابل قبول ہے اور انہیں اس کا جواب دینا پڑے گا۔

from امریکہ - وائس آف امریکہ https://ift.tt/2svO9lE