بھارت میں گاؤ رکھشا کے نام پر ایک اور شخص کا قتل

بھارت میں پولیس کا کہنا ہے کہ مشرقی جھاڑکھنڈ میں ہجوم نے پیر کے روز ایک شخص کو گائے ذبح کرنے کے شبہے میں قتل کر دیا ہے۔ یہ بھارت میں گاؤ رکھشا کے نام پر ہجوم کی طرف سے قتل کیے جانے کا حالیہ  ترین واقعہ ہے۔ نیوز ایجنسی رائیٹرز کے مطابق جھاڑکھنڈ کے ایک سینئر پولیس اہلکار ایم ایل مینا نے بتایا ہے کہ ریاستی دارالحکومت رانچی سے 50 کلومیٹر (30 میل) دور ایک جنگل میں گائے ذبح کرنے کے الزام میں دس سے پندرہ لوگوں نے اکٹھے ہو کر تین افراد پر حملہ کر دیا۔ انہوں نے ان تین افراد کو بری طرح مارا جن میں سے ایک شخص موقع پر ہلاک ہو گیا جبکہ دیگر افراد شدید زخمی ہو گئے۔ زخمی افراد کو ہسپتال میں داخل کر دیا گیا ہے۔ پولیس نے جھاڑکھنڈ کے کھنٹی ڈسٹرکٹ میں ہجوم کی طرف سے قتل کے اس واقعے کے بعد 8 افراد کو حراست میں لے لیا ہے۔ پولیس اہلکار مینا کا کہنا ہے کہ قتل کے اس واقعے کی تحقیقات شروع کر دی گئی ہے۔ بھارت میں گذشتہ چند برسوں کے دوران گاؤ رکھشا کے نام پر متعدد افراد کو ہجوم کی طرف سے قتل کیے جانے کے واقعات ہوتے رہے ہیں۔ ہدف بننے والے اکثر افراد اقلیتی مسلمان برادری سے تعلق رکھتے ہیں۔ تاہم پولیس اہلکار کا کہنا تھا کہ جن تین افراد پر اتوار کے روز حملہ کیا گیا، وہ مسلمان نہیں تھے۔

from جنوبی ایشیا - وائس آف امریکہ https://ift.tt/2kzYjxA