نہیں معلوم کہ نئے سسٹم میں کپتان کی کیا اتھارٹی ہوگی: سرفراز احمد

پاکستانی کرکٹ ٹیم کے کپتان سرفراز احمد نے جمعہ کے روز کراچی مصباح الحق کی بحیثیت ہیڈ کوچ اور چیف سیلیکٹر تعیناتی پر میڈیا سے بات کرتے ہوئے کہا کہ یہ ایک نیا سسٹم ہے اور اس میں مجھے نہیں پتہ کہ کپتان کی کیا اتھارٹی ہوگی۔ صحافیوں سے بات کرتے ہوئے سرفراز احمد کا کہنا ہے کہ پی سی بی کو زیادہ بہتر پتہ ہوگا کہ ٹیم سیلیکشن میں کپتان کو شامل ہونا چاہیئے یا نہیں۔ اپنی سپر فٹنس سے متعلق سوال پر سرفراز کا کہنا ہے کہ آپ کو لگ رہا ہے کہ میرا وزن کم ہوا ہے۔ حالیہ دنوں میں ہونے والا کیمپ اچھا تھا۔ جس سے مجھے اور دیگر لڑکوں کو بھی فائدہ ہوا ہے۔ سری لنکا کے دورہ پاکستان سے متعلق سرفراز کا کہنا ہے کہ پی سی بی کوشش کررہا ہے اور ہمیں دعا کرنی چاہیئے کہ پاکستان میں کرکٹ واپس آئے۔ ان کا مزید کہنا ہے کہ سری لنکا میں گرجہ گھروں پر ہونے والے حملوں کے بعد پاکستان نے اپنی انڈر نائینٹین ٹیم سب سے پہلے سری لنکا بھیجی۔ اب سری لنکا کو بھی چاہیئے کہ اپنی ٹیم پاکستان بھیجے۔ پاکستان بالکل ایک محفوظ ملک ہے۔ وہاب ریاض کی اچانک ریٹائرمنٹ کے فیصلے پر سرفراز احمد کا کہنا ہے کہ ٹیم کے ایک پلیئر کی ریٹائرمنٹ کے بعد بہت مشکل ہوتا ہے کہ اس کا متبادل جلدی ملے۔ ان کا مزید کہنا ہے کہ آسٹریلیا، سری لنکا اور بنگلہ دیش کے ساتھ آنے والی ٹیسٹ سیریز میں ڈومیسٹک کرکٹ کے نئے بولرز سے یہ خلا پُر کرنے کی کوشش کریں گے۔ پاکستان میں بین الاقوامی کرکٹ کی واپسی سے متعلق سوال پر سرفراز کا کہنا ہے کہ پچھلے دس سالوں میں پی سی بی نے بہت کوششیں کی ہیں۔ ان کا مزید کہنا ہے کہ پچھلے تین سالوں میں پاکستان میں بین الاقوامی کرکٹ واپس آئی، پاکستان سپر لیگ کے دو فائنل ہوچکے ہیں۔ ورلڈ الیون پاکستان میں کھیل کر گئی ہے۔ اب آئی سی سی اور دیگر بورڈز کو چاہیئے کہ وہ پاکستان کو سپورٹ کریں۔ مصباح الحق اور وقار یونس کی تعیناتی سے متعلق پوچھے گئے سوال پر سرفراز کا کہنا ہے کہ یہ تو پی سی بی نے فیصلہ کرنا ہے کہ کون کپتان ہوگا۔ وہ پہلے بھی مصباح او وقار کو سپورٹ کرتے رہے ہیں اور آگے بھی کرتے رہیں گے۔ کراچی میں پریس کانفرنس کرتے ہوئے سرفراز کا کہنا ہے کہ کپتان کو بورڈ کی حمائت حاصل ہونی چاہیئے اور پھر ہی کپتان مظبوط ہوتا ہے۔ ڈومیسٹک کرکٹ میں نئے نظام سے متعلق قائداعظم ٹرافی میں سندھ کی نمائندگی کرنے والے سرفراز احمد کا کہنا ہے کہ جس ٹیم کا پلیئر کارکردگی دکھائے گا۔ اس ٹیم کا کوچ، چیف سیلیکٹر کو اس کھلاڑی سے متعلق مطلع کرے گا۔

from کھیل - وائس آف امریکہ https://ift.tt/2ZZ7lrk