مسلح گروہوں کی پاکستان میں اب کوئی جگہ نہیں، عمران خان

پاکستان کے وزیر اعظم عمران خان نے کہا ہے کہ کالعدم تنظیموں اور انتہا پسندوں کے خلاف جاری کاروائیاں معاشی استحکام کے لئے ضروری ہیں یہ کسی بیرونی دباؤ کا نتیجہ نہیں۔ منگل کو اسلام آباد میں غیر ملکی صحافیوں سے ملاقات کے دوران گفتگو کرتے ہوئے عمران خان کا کہنا تھا کہ کالعدم تنظیموں کے خلاف کاروائی پاکستان کے اپنے مفاد میں ہے۔ یہ تاثردرست نہیں کہ یہ کاروائیاں فنانشل ٹاسک فورس کے دباؤ کے تحت کی جارہی ہیں۔ عمران خان کا کہنا تھا کہ ہماری توجہ معیشت کی بحالی کی جانب مرکوز ہے۔ پاکستان بلیک لسٹ ہونے کا متحمل نہیں ہو سکتا معاشی پابندیوں سے مشکلات مزید بڑھیں گی۔ عمران خان کا کہنا تھا کہ حالیہ اقدامات کے تحت حکومت 30000 ہزار مدارس کو قومی دھارے میں لانے اورانتہاپسندانہ سوچ رکھنے والے ہزاروں افراد کی بحالی پر کام کررہی ہے۔ وزیر اعظم عمران خان کا کہنا تھا کہ حکومت اورعوام نے طے کرلیا ہے کہ کسی مسلح گروپ کو یہاں پنپنے نہیں دیں گے۔ یہ پاکستان کے روشن مستقبل کے لئے ضروری ہے۔ کالعدم تنظیموں کے خلاف کاروائی پرداخلی مزاحمت کے سوال پرعمران خان کا کہنا تھا اس معاملے پرحکومت ، افواج اور آئی ایس آئی ایک ہی صفحے پر ہیں۔ 'افغان جہاد' ختم ہونے پر ہم نے ایسے مسلح گروہوں کو کھلا چھوڑ دیا یہ ایک غلطی تھی۔ معاصر نشریاتی ادارے بی بی سی کو دئیے گئے انٹرویو میں عمران خان کا کہنا تھا کہ پاکستان اور بھارت کے درمیان پائیدارامن کی راہ میں مسئلہ کشمیر بڑی رکاوٹ ہے۔ عمران خان کا کہنا تھا کہ دو ایٹمی قوتوں کے پاس مذاکرات کے زریعے مسائل حل کرنے کے سوا کوئی چارہ نہیں۔ وزیراعظم عمران خان نے مزید کہا کہ ان کا بھارتی حکومت اورعوام کے لئے یہ پیغام ہے کہ دونوں ممالک کی پہلی ترجیح غربت کا خاتمہ ہونی چاہیے۔ تاہم اس سے قبل ضروری ہے کہ ہم باہمی اختلافات ختم کریں اور یہ مسئلہ کشمیر کے حل کے بغیر ممکن نہیں۔ واضح رہے کہ 14 فروری کو بھارتی کشمیر کے علاقے پلوامہ میں بھارتی سیکورٹی فورسز کی بس پر خود کش حملے کے بعد پاکستان اور بھارت کے درمیان کشیدگی میں اضافہ ہوگیا تھا۔ پاکستان نے اس واقعے کے بعد کالعدم تنظیموں کے خلاف کاروائی تیز کرتے ہوئے کالعدم جیش محمد کے سربراہ مولانا مسعود اظہر کو نظر بند کر دیا تھا۔ تاہم بھارت کا یہ موقف رہا ہے کہ پاکستان کی یہ کاروائیاں محض دکھاوا ہیں اور ماضی میں بھی پاکستانی حکومتیں ایسے دعوے کرتی رہی ہیں۔  

from جنوبی ایشیا - وائس آف امریکہ http://bit.ly/2WZ28d7