پاکستان اور روس کے درمیان دفاعی معاہدہ

پاکستان اور روس کے درمیان ایک اہم دفاعی معاہدے پر دستخط ہو گئے ہیں جس کے تحت پاکستان فوج کے افسروں کیلئے روسی فوجی تربیت کا دروازہ کھل گیا ہے۔ روس کے ساتھ پاکستان کا دفاعی معاہدہ ایسے وقت میں ہوا ہے جب پاکستان اور امریکہ کے تعلقات مسلسل کشیدہ ہوتے جا رہے ہیں اور پاکستان کیلئے تمام تر امریکی فوجی امداد بند ہو چکی ہے۔ ان حالات میں پیدا ہونے والے خلا کو پر کرنے کیلئے روس خصوصی دلچسپی لے رہا ہے۔ پاکستانی وزارت دفاع کے ایک بیان کے مطابق یہ معاہدہ روس پاکستان مشترکہ فوجی مشاورتی کمیٹی JMCC کے دو روزہ ابتدائی اجلاس کے بعد منگل کے روز طے پایا۔ راولپنڈی میں ہونے والے اجلاس میں پاکستانی وفد کی قیادت سیکٹری دفاع لفٹننٹ جنرل (ریٹائرڈ) ضمیرالحسن شاہ اور روسی وفد کی قیادت پاکستان کے دورے پر آئے ہوئے روسی نائب وزیر دفاع کرنل جنرل ایلگزینڈر فومن نے کی۔ وزارت دفاع کے بیان میں کہا گیا ہے کہ دونوں فریقین نے مستقبل میں دو طرفہ تعاون کے بارے میں بھی تفصیلی بات چیت کی۔ اجلاس کے اختتام پر دستخط ہونے والے معاہدے کے مطابق پاکستانی فوج کے افسر روس کی فوجی تربیت کے ادارے میں تربیت حاصل کر سکیں گے۔ اس سے قبل روس پاکستان کو چار جدید Mi-35M لڑاکا ہیلی کاپٹر فروخت کر چکا ہے جس کے بعد دونوں ملکوں نے ایک دوسرے کی سرزمین پر دہشت گردی کے خلاف آپریشنز کے حوالے سے دو مشترکہ فوجی مشقوں میں حصہ لیا ہے۔ دونوں ممالک کی بحریہ نے بھی حال ہی میں بحیرہ عرب میں منشیات کے خلاف مشترکہ مشقوں میں حصہ لیا۔ پاکستان کے بحری جنگی جہازوں نے گزشتہ ہفتے سینٹ پیٹرزبرگ میں منعقدہ روسی بحریہ کی پریڈ میں بھی حصہ لیا  ۔ پاکستان میں روسی سفیر الیکسی دیدوو نے بتایا کہ روسی بحریہ کی پریڈ میں پاکستانی بحری جہازوں کی شرکت اسلئے بھی اہم ہے کہ اس پریڈ کا معائنہ روس کے صدر اور ملک کے کمانڈر ان چیف  صدر پوٹن نے خود کیا تھا۔

from خبریں - وائس آف امریکہ https://ift.tt/2nni3SO