امریکہ میں قتل کے اہم گواہ کا پر اسرار قتل

امریکی ریاست ٹیکساس کے شہر ڈیلس میں ایک سابقہ پولیس افسر ایمبر گائیگر کے مقدمہ قتل کے اہم گواہ جوشوا براؤن کو اس کے اپارٹمنٹ کمپلیکس کی پارکنگ لاٹ میں قتل کر دیا گیا ہے۔ ایمبر گائیگر پر بوتھم جین نامی شخص کو قتل کرنے کے جرم میں عدالت نے 10 سال قید کی سزا سنائی ہے۔ بتایا جاتا ہے کہ جوشوا براؤن مقتول بوتھم جین کا ہمسایہ تھا۔ وقوعہ کے روز بوتھم جین ستمبر 2018 میں اپنے اپارٹمنٹ میں موجود تھا جب ڈیلس کی پولیس افسر ایمبر گائیگر اپارٹمنٹ میں داخل ہوئی اور اس نے فائرنگ کر کے جین کو ہلاک کر دیا تھا۔ اطلاعات کے مطابق ایمبر گائیگر اس وقت ڈیوٹی پر نہیں تھی لیکن وہ پولیس کی وردی میں مقتول کے اپارٹمنٹ میں داخل ہوئی اور اسے ہلاک کر دیا۔ جوشوا براؤن اس قتل کے مقدمے میں اہم گواہ تھا۔ پولیس نے میڈیا کو بتایا کہ جمعہ کے روز لگ بھگ ساڑھے دس بجے صبح اپارٹمنٹ بلڈنگ کی پارکنگ لاٹ میں گولیاں چلنے کی آوازیں آئیں۔ عینی شاہدوں کا کہنا ہے کہ فائرنگ کے بعد انہوں نے پارکنگ لاٹ میں سے  ایک کار کو تیز رفتاری سے باہر جاتے دیکھا تھا۔ پولیس کا کہنا ہے کہ قاتل کو ابھی تک گرفتار نہیں کیا جا سکا ہے۔ بتایا جاتا ہے کہ مقتول امریکہ میں آتشیں اسلحے سے ہونے والے پر تشدد واقعات  سے خوفزدہ تھا اور اسے خدشہ تھا کہ وہ بھی ایسے ہی کسی واقعہ کا نشانہ بن سکتا ہے۔ اس  نے مقدمے کی جیوری کے سامنے جذباتی انداز میں قتل کے واقعے کی شہادت دی تھی۔ اس نے جیوری کو بتایا تھا کہ پولیس افسر ایمبر کے ہاتھوں قتل ہونے والے اس کے ہمسائے بوتھم جین سے وقوعہ کے روز ہی اس کی پہلی بار ملاقات ہوئی تھی۔ اس نے بتایا کہ بعد میں وہ اپارٹمنٹ بلڈنگ کے ہال میں جا رہا تھا کہ اس نے بوتھم جین کے اپارٹمنٹ سے گولیاں چلنے کی آوازیں سنی تھیں۔ ایمبر کا کہنا تھا کہ وہ غلط اپارٹمنٹ میں داخل ہو گئی تھی اور جین کو دیکھ کر اس نے سمجھا کہ وہ کوئی اجنبی شخص تھا اور وہ کسی غلط ارادے سے اپارٹمنٹ میں داخل ہوا تھا۔ اسلئے اس نے غلط فہمی میں اس پر گولی چلا دی۔ 31 سالہ پولیس افسر ایمبر گائیگر کو بدھ کے روز قتل کی مجرم قرار دیتے ہوئے 10 سال قید کی سزا سنائی گئی۔

from امریکہ - وائس آف امریکہ https://ift.tt/30RtTG0