کشمیر میں حالیہ بھارتی اقدامات پر ’شدید تشویش‘ ہے، اقوام متحدہ

انسانی حقوق کیلئے اقوام متحدہ کی ہائی کمشنر مشیل بیچیلے نے کہا ہے کہ انہیں بھارتی حکومت کی طرف سے کشمیر میں کیے جانے والے حالیہ اقدامات پر ’’شدید تشویش‘‘ ہے۔ انہوں نے بھارتی حکومت کی جانب سے جموں اور کشمیر کی نیم خود مختار حیثیت کے خاتمے پر بھی گہری تشویش کا اظہار کیا۔ انہوں نے اقوام متحدہ کی انسانی حقوق کی کونسل کے اجلاس  میں اپنے افتتاحی خطاب کے دوران کہا کہ کشمیر میں انٹرنیٹ، مواصلاتی رابطوں اور پر امن اجتماع پر پابندیاں، اور مقامی سیاسی رہنماؤں اور کارکنوں کی گرفتاریاں خاص طور پر باعث تشویش ہیں۔ مشیل بیچیلے نے کہا کہ یہ بات انتہائی اہم ہے کہ کشمریوں کے مستقبل کے حوالے سے کسی بھی فیصلے سے پہلے کشمیریوں سے براہ راست معلوم کیا جائے کہ وہ کیا چاہتے ہیں۔ انہوں نے بھارت سے اپیل کی کہ وہ فوری طور پر کرفیو ہٹائے تاکہ لوگوں کی بنیادی خدمات تک رسائی ممکن ہو سکے۔ انہوں نے بھارت سے یہ بھی کہا کہ وہ اس بات کو یقینی بنائے کہ کشمیر میں گرفتار کیے جانے والے سیاسی رہنماؤں ، کارکنوں اور عام شہریوں کے بنیادی انسانی حقوق کا احترام کیا جائے۔ اقوام متحدہ کے انسانی حقوق کے ادارے کی سربراہ کا یہ خطاب بھارت کی جانب سے اتوار کے روز  کرفیو کے دوران محرم کے جلوس نکالنے کے بعد سیکورٹی مذید سخت کرنے کے ایک روز بعد سامنے آیا ہے۔ پاکستان کے وزیر خارجہ شاہ محمود قریشی بھی جنیوا روانہ ہو گئے ہیں جہاں وہ منگل کے روز اس اجلاس سے خطاب کریں گے اور کشمیر میں بھارتی حکومت کے اقدامات کے حوالے سے بات کریں گے۔ بھارتی حکومت نے 5 اگست کو جموں اور کشمیر کی نیم خود مختار حیثیت ختم کرتے ہوئے سخت فوجی پابندیاں عائد کر دی تھیں۔ مشیل بیچیلے نے بھارت کی ریاست آسام میں شہریت کی اندراج سے متعلق متنازعہ فیصلے پر بھی تشویش کا اظہار کیا ۔ ناقدین کا کہنا ہے کہ بھارتی حکومت کا یہ اقدام مسلمانوں کو شہریت سے محروم کرتے ہوئے انہیں ملک سے خارج کرنے کی غرض سے حکمران قوم پرست جماعت بھارتیہ جنتا پارٹی کا سوچا سمجھا منصوبہ ہے۔ بیچیلے کا کہنا تھا کہ اس اقدام کے ذریعے 31 اگست کو شائع ہونے والی فہرست  سے 19 لاکھ مسلمانوں کو خارج کر دیا گیا ہے اور اس سے علاقے  کے مسلمانوں میں شدید پریشانی اور بے یقینی کی کیفیت پیدا ہو گئی ہے۔ انہوں نے بھارتی حکومت سے اپیل کی کہ اس سلسلے میں انصاف برتا جائے، مسلمانوں کو جلا وطن نہ کیا جائے اور انہیں زیر حراست نہ رکھ جائے۔ انہوں نے مذید کہا کہ بھارتی حکومت ہر صورت ان 19 لاکھ مسلمانوں کو بے وطن ہونے سے بچائے۔

from دنیا - وائس آف امریکہ https://ift.tt/31awtYW