بنگلادیش میں انتخابات ، جھڑپوں میں10افراد ہلاک

بنگلادیش میں اتوار کو سخت کشیدگی اور سیاسی تناؤ کے درمیان پارلیمانی الیکشن کے لیےووٹنگ کا عمل جاری ہے ۔اس دوران سیاسی کارکنوں میں جھڑپوں اور پولیس فائرنگ سے10افراد ہلاک ہوگئے جبکہ کئی افراد کے زخمی ہونے کی اطلاعات ہیں۔  خبر رساں اداروں کے مطابق حکومت نے مخالفوںکو کنٹرول کرنے کے لئے ناصرف انٹرنیٹ سروس بند کررکھی ہے بلکہ ایک اہم ٹی وی چینل ’ جمونا ٹی وی ‘کی نشریات پر بھی پابندی لگا دی ہے ۔ حکومت کی جانب سے مخالف سیاسی کارکنوں کے خلاف کریک ڈاؤن کی بھی اطلاعات زیر گردش ہیں۔ پرتشدد کارروائیوں میں مرنے والوں کا تعلق زیادہ تر مخالف سیاسی جماعتوں سے ہے ۔ تشدد کی وجہ اپوزیشن جماعتوں کی جانب سے حکومت پر دھاندلی کے الزام بتائے جارہے ہیں۔ انتخابات میں حکمراں جماعت کی فتح ہونے کی صورت میں شیخ حسینہ واجد مسلسل تیسری مدت کے لئے وزیر اعظم بنیں گی ۔ اس وقت بھی وہی برسر اقتدار ہیں ۔  ان کی مخالف اپوزیشن رہنما خالدہ ضیاء ہیں جو ناصرف بیمار ہیں بلکہ زیر حراست بھی ہیں۔ ان پر بدعنوانی کے الزامات ہیں جبکہ پارٹی کی قیادت ان کے بیٹے کے پاس ہے جو جلا وطن ہیں۔   اتوار کو ہونے والے انتخابات اپنے مقررہ وقت سے ایک سال قبل ہورہے ہیں جس کی وجہ ملک میں جاری شدید عوامی رد احتجاج اور مظاہرے ہیں۔ عوامی رد عمل اور پرتشدد کارروائیوں کو کنٹرول کرنے کے لئے حکومت نے بڑے پیمانے پر سیکورٹی کے فول پروف انتظامات کرنے کا دعویٰ کیا ہے۔ پارلیمان کی کل 300 نشستوں کے لئے تقریباً 10 کروڑ ووٹرز اتوار کی شام تک اپنا حق رائے دہی استعمال کریں گے ۔ اصل مقابلہ حکمراں جماعت عوامی لیگ اور اپوزیشن جماعت بنگلا دیش نیشنل پارٹی کے درمیان ہے ۔  خالدہ ضیا 1991 سے 1996 اور 2001 سے 2006 تک دو مرتبہ وزیر اعظم کے منصب پر فائز رہ چکی ہیں ۔ ان کے مقابلے میں حسینہ واجد 1996 سے 2001، 2009 سے 2014 اور 2014 سے تاحال وزارت عظمیٰ پربراجمان ہیں۔

from جنوبی ایشیا - وائس آف امریکہ http://bit.ly/2VhJXzC