بھارت میں کرتار پور صاحب راہداری کا سنگ بنیاد رکھ دیا گیا

بھارت کے نائب صدر ایم وینکیا نائیڈو نے ایک تقریب میں پیر کے روز ڈیرہ بابا نانک ۔ کرتارپور صاحب راہداری کا سنگ بنیاد رکھا۔ یہ تقریب بھارت اورپاکستان سرحد کے نزدیک گورداس پور ضلع کے مان گاؤں میں منعقد ہوئی۔ تقریب میں بھارتی پنجاب کے وزیر اعلیٰ کیپٹن امریندر سنگھ، ریاستی گورنر اور دیگر وزراء بھی موجود تھے۔ وینکیا نائڈو نے اس موقع پر کہا کہ ہمیں امید ہے کہ اس راہداری سے امن قائم ہوگا اور عوام کی خوشحالی کا راستہ ہموار ہوگا۔ انھوں نے کہا کہ ہم نے ایک چھوٹا سا قدم اٹھایا ہے توقع ہے کہ اس سے ہم پرامن اور دوستانہ زندگی کا ہدف حاصل کریں گے۔ مرکزی وزیر نتن گٹکری نے کہا کہ راہداری کی تعمیر کا کام چار ماہ میں مکمل ہو جائے گا۔ اس راہداری کی تعمیر کا فیصلہ 22 نومبر کو مرکزی کابینہ کے ایک اجلاس میں کیا گیا تھا۔ راہداری پر تمام قسم کی سہولتیں موجود ہوں گی۔ یہاں تک کہ ویزا اور کسٹم کی سہولت بھی ہوگی۔   خیال رہے کہ سکھ یاتریوں کے لیے اس راہداری سے پاکستان کی سرحد کے اندر واقع تاریخی دربار صاحب تک رسائی آسان ہو جائے گی۔ سکھ مت کے بانی گرو نانک دیو نے اس مقام پر اپنی زندگی کے آخری 18 سال گزارے تھے۔ پاکستان کے وزیر اعظم عمران خان کرتارپور راہداری کا سنگ بنیاد 28 نومبر کو رکھیں گے۔ پاکستان کے وزیر خارجہ شاہ محمود قریشی نے بھارت کی وزیر خارجہ سشما سوراج کو تقریب میں شرکت کی دعوت دی تھی۔ تاہم سشما سوراج نے اسمبلی انتخابات میں اپنی مصروفیت کے سبب اس تقریب میں شرکت سے انکار کر دیا البتہ انھوں نے کہا کہ دو وزرا ء ہرسمرت کور اور ہردیپ سنگھ پوری اس تقریب میں شرکت کریں گے۔ پنجاب کے وزیر اعلیٰ کیپٹن امریندر سنگھ نے بھی پاکستان جانے سے معذرت کر لی ہے لیکن ان کی حکومت کے ایک وزیر نوجوت سنگھ سدھو اس میں شریک ہوں گے۔

from جنوبی ایشیا - وائس آف امریکہ https://ift.tt/2AmqG6l